मिलन नाविक

छापिन्छन् मनका भावना मानौ समाचार हुन्
मान्छेका अनुहार अनुहार होइनन् अखबार हुन्

मान्छे बनें कि म पनि यस्तो चाहना राख्छु
कोही नहुन आफ्नो अघि, पछि हजार हुन्

भित्ताले हैन बिश्वासले घरलाई घर बनाउँछ
गरिबका झुपडी हुन् या राजाका दरबार हुन्

पसिनाले मात्र बन्दैन गजल आँसु नै चुहिनुपर्छ
मेरा गजल मेरा कहाँ हुन् उनकै उपहार हुन्

~ मिलन नाविक ~
Milan Nabik

 

मिलन लम्साल 'नाविक' 

Milan Lamsal Nabik

झापा, दमक 

हाल: एरिजोना, अमेरिका

संलग्नता: नेपालीगजल.कम 

थप गजलहरु 

गजल १

यो यात्रा हो, बाटाहरु सोधिंदै खोजिंदै जान्छन 

जोडिने जोडिंदै जान्छन, छोडिने छोडिंदै जान्छन

दुश्मनले कसैलाई हाम्रो यो भेद सुनाएर पठायो 

थोरै माया देखाए पुग्छ, मिलनहरु पोखिदै जान्छन 

लाग्छ उनको अनुहार मै पनि एउटा स्पिड ब्रेकर छ 

जो जो जान्छन छेउ बाट, सबै रोकिदै जान्छन 

मदिराको मात हुनु पर्छ अनि उनको साथ् हुनुपर्छ 

बोल्नु हुने नहुने कुरा, सबै बोलिंदै जान्छन

· · ────── ꒰ঌ·✦·໒꒱ ────── · ·

गजल २ 

दुःख त सहनु नै छ, अरु सबैले सहे जस्तो
तर देखिनु पनि छ, दुःखनै नभए जस्तो

म यत्ति मै खुशी छु, कम्तिमा जीवन त छ
तिमी सोध्छौ जिन्दगी किन भएन सोचे जस्तो

मेरो भरोसाको ईज्जत तिमीले यसरी राखेको छौ-
तिमी साथ हुँदा लाग्छ साथ कोही नभए जस्तो

परेलीमा अडिएको छ तिम्रो नामको आँसु
कर्कलाको पात माथि शित जमे जस्तो

सम्मोहन होस यस्तो कि दुश्मनकै पनि वाह भनौं
मेरो अँगालोमा तिमीलाई उसैको याद आए जस्तो

· · ────── ꒰ঌ·✦·໒꒱ ────── · ·

गजल ३ 

हुन त उ सँग फ़िर्केर बोल्ने पनि मन छैन 

तर लडाईं नै गर्ने आफ्नो परिस्थिति झन छैन 

मैले कुनै बाध्यताले आफ्नो स्वरुप बदलेको हुँ

भित्रै बाट हेर ममा कुनै परिबर्तन छैन 

तिमी जस्तो देखिनछौ, उस्तै भनेको हुँ तिमीलाई 

हाम्रो तिर धेरै भूमिका बाँध्ने चलन छैन 

शुभचिन्तक, साथीभाई, आफ्ना सारा छन् तिमीसंग 

फेरी केको गुनासो गर्छौ कि साथमा मिलन छैन 

~ मिलन नाविक ~
Milan Nabik