खगेन्द्र गिरी 'कोपिला'

 सम्झनाका छायाँहरू सम्झिर’न पाए पुग्यो

जूनकीरीझैँ अँधेरीमा चम्किर’न पाए पुग्यो

सँगालेर पीडाहरू अँगालेर खुसीहरू

हृदयको गोरेटोमा लम्किर’न पाए पुग्यो

मनको भाखा दिलको लय शब्दबाट पोखिएर

सुस्केरा र सुसेलीमा घन्किर’न पाए पुग्यो

कोट्याएर आफ्नै घाउ बल्झाएर आफ्नै व्यथा

परेलीमा कैलेकाहीँ छल्किर’न पाए पुग्यो

सम्झिएर हिमाल, पहाड सम्झिएर तराईं मधेस

नेपाली भै पटकपटक, जन्मिर’न पाए पुग्यो ।

~ खगेन्द्र गिरी 'कोपिला' ~

Khagendra Giri 'Kopila' 

खगेन्द्र गिरी 

नेपालगञ्ज

प्रकाशित कृतिहरु: 

उस्तैउस्तै नदीका उस्तैउस्तै छालहरू (संयुक्त, २०५९)

व्यग्र चाँदनी (२०६१)